Өңірлік ғылымды дамыту – маңызды міндет

Атырау өңірі табиғи ресурстарға бай және экономикалық әлеуеті зор аймақ. Сондықтан бұл жерде ғылымды дамыту – маңызды міндет. Өңірлік ғылымның өркендеуі экономикалық өсімнің артуына тікелей ықпал ете алады. Алайда өңірлерде ғылым саласына инвестиция тарту бойынша нақты шаралар қабылданбаған, сондай-ақ оны қаржыландыруға қатысты арнайы бағдарлама жоқ. Бүгін Атырауға жұмыс сапарымен барған ҚР Президенті жанындағы Ұлттық Ғылым Академиясының президенті Ақылбек Күрішбаев бұл мәселеге назар аударды. Ол «Қуатты өңірлік ғылым – қуатты өңір» тақырыбында өткен ҰҒА Президиумының көшпелі отырысында ғылыми зерттеулер мен өндіріс арасындағы байланысты нығайту, өңірлік ғылымның әлеуетін арттыру мәселелерін талқылады. Жиын барысында республикалық ғылыми-зерттеу институттарының басшылары өз тәжірибелерімен бөлісті. Сондай-ақ былтыр облыста құрылған Ғылыми-техникалық кеңестің жұмысын жандандыру жөнінде бірқатар ұсыныс айтылды. Ақылбек Күрішбаев, ҚР Президенті жанындағы Ұлттық ғылым академиясының президенті: -Жергілікті жерден берілетін ғылымға деген қаржы 1 процент құрайды. 1 процентке жетпейді. Тек қана 8 облыс өңірлік ғылымға қаражат бөліп отыр. Кездесудің шеңберінде бүгін меморандумға қол қойылады. Өңірлік ғылым мен орталық қалаларда жұмыс істейтін ғалымдар бірлесіп, үлкен жобаларды бастауымыз керек. Айтайын, егер өңірлік ғылымды дамытпасақ, бізде Қазақстанда ғылымның тиімділігі төмендейді. Бұл өте маңызды жұмыс.